Ambrose of Milan, On the Mysteries, in Tamil.
அத்தியாயம் 1
புனித அம்புரோஸ், புனிதமான வாழ்க்கைமுறை பற்றிப் பேசிய பிறகு, இப்போது மறைபொருட்களைப் பற்றி விவாதிக்கப் போவதாகக் கூறுகிறார். பின்னர், இதற்கு முன்பு அவ்வாறு செய்யாததற்கான தனது காரணங்களைக் கூறிய பிறகு, அவர் செவிகள் திறக்கப்படட்டும் என்பது குறித்த மறைபொருளை விளக்குகிறார். மேலும் இது முற்காலத்தில் கிறிஸ்துவால் எவ்வாறு செய்யப்பட்டது என்பதையும் விளக்குகிறார்.
1. பிதாக்களின் செயல்களோ அல்லது நீதிமொழிகளின் போதனைகளோ வாசிக்கப்படும்போது, நாம் தினமும் ஒழுக்கம் சார்ந்த விஷயங்களைப் பற்றிப் பேசி வந்தோம். இவற்றால் கற்பிக்கப்பட்டு அறிவுறுத்தப்பட்டு, நீங்கள் முன்னோர்களின் வழிகளில் பிரவேசிக்கவும், அவர்களுடைய பாதைகளில் நடக்கவும், தெய்வீகக் கட்டளைகளுக்குக் கீழ்ப்படியவும் பழகிக்கொள்ள வேண்டும் என்பதற்காகவும்; திருமுழுக்கினால் புதுப்பிக்கப்பட்டு, கழுவப்பட்டவர்களுக்குத் தகுந்த வாழ்க்கை முறையை நீங்கள் கடைப்பிடிக்க வேண்டும் என்பதற்காகவும் இவ்வாறு செய்தோம்.
2. திருமறைகளைப் பற்றிப் பேசவும், அருட்சாதனங்களின் பொருளை விளக்குவதற்காகவுமே இக்காலம் நம்மை ஊக்குவிக்கிறது. திருமுழுக்குக்கு முன்பு, அதுவரை தீட்சை பெறாதவர்களுக்கு இதைக் கற்பிக்க நாம் முடிவு செய்திருந்தால், நாம் திருமறைகளை முன்வைப்பதற்குப் பதிலாக அவற்றை வெளிப்படுத்துபவர்களாகவே இருந்திருப்போம். அத்தோடு, நாம் முன்னதாக ஒரு விளக்கத்தை அளித்திருந்தால் அதனால் ஏற்பட்டிருக்கக்கூடிய தாக்கத்தை விட, ஆர்வமுள்ள, அதேவேளை என்னமாதிரியானவற்றை எதிர்பார்க்க வேண்டும் என்று அறியாதவர்கள் மீது திருமறைகளின் ஒளி அதிக தாக்கத்தை ஏற்படுத்தியிருக்கக்கூடும்.
3. அடுத்து, கவனமாகச் செவிசாய்த்து, அருட்சாதனங்கள் வழியாக உங்களுக்கு வழங்கப்பட்ட நித்திய ஜீவன் எனும் அற்புதமான கொடையை உள்வாங்கிக் கொள்ளுங்கள். திறப்பின் மறைபொருளைக் கொண்டாடும்போது, மாற்கு 7:34 இல் கூறப்பட்டவாறு “திறக்கப்படுவாயாக!” என்று பொருள்படும் ‘Epphatha’ பற்றி நாங்கள் கூறியதன் மூலம் இதை உங்களுக்குக் காட்டினோம். சமாதானத்தைத் தேடும் எவரும் தன்னிடம் என்ன கேட்கப்பட்டது என்பதைப் புரிந்துகொண்டு, அதற்கான பதிலைத் தயார் செய்து கொள்ள வேண்டும் என்பதற்காகவே இது செய்யப்பட்டது.
4. நாம் வாசிக்கிறபடி, நற்செய்தியில் செவிப்புலன் அற்றவனாகவும், வாய்பேச முடியாதவனுமாகிய ஒருவனைக் குணப்படுத்தியபோது கிறிஸ்து இந்த “எப்பத்தா!” அதாவது “திறக்கப்படுவாயாக!” என்ற புனித இரகசியத்தைப் பயன்படுத்தினார். அவர் அந்த மனிதனின் வாயைத் தொட்டார், ஏனெனில் அந்த மனிதன் வாய்பேச முடியாத ஒரு ஆணாக இருந்தான். இந்தத் தொடுதல் இரண்டு நோக்கங்களுக்குப் பயன்பட்டது: ஒன்று, அவருக்கு அளிக்கப்பட்ட குரலுடன் அவர் பேசுவதற்காக அவரது வாயைத் திறப்பது; மற்றொன்று, அந்தத் தொடுதல் ஒரு ஆணுக்குப் பொருத்தமானதாகவும், அதேவேளை ஒரு பெண்ணுக்குப் பொருத்தமற்றதாகவும் இருந்திருக்கும் என்பதாலும் ஆகும்.
அத்தியாயம் 2
திருச்சபையில் நுழையவிருந்த மக்கள் என்ன வாக்குறுதிகளை அளித்தார்கள், அவர்கள் அந்த வாக்குறுதிகளை அளித்ததை யார் கண்டார்கள்? மற்றும் அவர்கள் ஏன் கிழக்கு நோக்கித் திரும்பினார்கள்?
5. இதற்குப் பிறகு, மகா பரிசுத்த ஸ்தலம் உங்களுக்குத் திறக்கப்பட்டது, நீங்கள் மறுபிறப்பின் ஸ்தலத்திற்குள் பிரவேசித்தீர்கள். உங்களிடம் கேட்கப்பட்டதை நினைவுகூரும் அதேவேளை, நீங்கள் பதிலளித்ததையும் நினைவில் கொள்ளுங்கள். நீங்கள் பிசாசையும் அவனுடைய கிரியைகளையும், உலகின் ஆடம்பரங்களையும் இன்பங்களையும் துறந்தீர்கள். நீங்கள் சொன்னது மரித்தோரின் கல்லறைகளில் அல்ல, ஜீவனுள்ளோரின் புத்தகத்தில் பாதுகாக்கப்படுகிறது.
6. நீங்கள் திருத்தொண்டரையும், குருவையும், ஆயராகிய பிரதான குருவையும் கண்டீர்கள். அவர்கள் எப்படிப் பட்டவர்கள் என்பதைப் பற்றி மட்டும் சிந்திக்காமல், மறைபொருள்களின் அருளில் கவனம் செலுத்துங்கள். மல்கியா 2:7 இல் “ஒரு ஆசாரியன் தேவனுடைய போதனைகளை கற்றிருக்கவேண்டும். ஜனங்கள் ஆசாரியனிடம் சென்று தேவனுடைய போதனைகளை கற்றுக்கொள்ளவேண்டும். ஒரு ஆசாரியன் தேவனுடைய தூதுவனாக ஜனங்களுக்கு இருக்க வேண்டும்” என்று நமக்குச் சொல்கிறது. ஏனெனில் அவர் சர்வவல்லமையுள்ள கர்த்தரின் தூதர். அங்கே பொய்க்கோ மறுப்புக்கோ இடமில்லை. அவர் கிறிஸ்துவின் இராச்சியத்தையும் நித்திய ஜீவனையும் அறிவிக்கும் ஒரு தூதர். நீங்கள் அவரை அவருடைய தோற்றத்திற்காக அல்ல, அவருடைய பங்களிப்பிற்காக என்றாலும் மதிக்க வேண்டும். அவர் உங்களுக்குக் கற்பித்ததைப் பற்றி சிந்தியுங்கள், அவர் பகிர்ந்துகொண்ட வாழ்க்கை முறையைக் கருத்தில் கொள்வதோடு, அவருடைய நிலையை அங்கீகரியுங்கள்.
7. பின்பு, நீங்கள் உங்கள் எதிராளியை நேருக்கு நேராக மறுதலிக்க வேண்டும் என்பதற்காக உள்ளே பிரவேசித்தீர்கள்; பின்பு கிழக்கு நோக்கித் திரும்பினீர்கள்; ஏனெனில், ஒருவன் பிசாசை மறுதலிக்கும் போது, அவன் கிறிஸ்துவிடம் வந்து அவரைக் கண்கூடாகப் பார்க்கிறான்.
அத்தியாயம் 3
நீரிலும் புனித ஊழியர்களிடத்திலும் கடவுள் எவ்வாறு பிரசன்னமாகிச் செயல்படுகிறார் என்பதைப் பற்றி நாம் சிந்திக்க வேண்டும் என்று புனித அம்ப்ரோஸ் விளக்குகிறார். மேலும், பழைய ஏற்பாட்டிலிருந்து திருமுழுக்குக்கான எடுத்துக்காட்டுகளையும் அவர் பகிர்ந்துகொள்கிறார்.
8. நீங்கள் என்ன கண்டீர்கள்? நிச்சயமாகத் தண்ணீர், ஆனால் தண்ணீர் மட்டுமல்ல; உதவி குருக்கள் அங்கே ஊழியம் செய்வதையும், ஆயர் கேள்விகள் கேட்டு தண்ணீரை ஆசீர்வதிப்பதையும் நீங்கள் கண்டீர்கள். முதலாவதாக, நாம் காணக்கூடியவற்றின் மீது அல்ல, நாம் காண முடியாதவற்றின் மீது கவனம் செலுத்தும்படி அப்போஸ்தலர் உங்களுக்குப் போதித்தார். ஏனெனில், நாம் காண்பது தற்காலிகமானது, நாம் காண முடியாதது நித்தியமானது என்று 1 கொரிந்தியர் 5:18-ல் கூறப்பட்டுள்ளது.அதேபோல, “தேவனைப் பற்றிய பல உண்மைகள் மனிதர்களால் காண முடியாததாக உள்ளது. அவர் முடிவில்லாத வல்லமையும், தெய்வத்துவமும் கொண்டவர். ஆனால் உலகம் உண்டான நாள் முதல் மக்களால் அவரை அவரது படைப்புகள் மூலம் எளிதில் புரிந்துகொள்ளும் விதத்திலேயே இருக்கிறார்” என்று ரோமர் 1:20 கூறுவதைக் காணலாம். “நீங்கள் என்னை நம்புவதில்லையானாலும் நான் செய்கின்றவற்றை நம்பித்தான் ஆகவேண்டும். நான் பிதாவிடமும் பிதா என்னிடமும் இருக்கிறார் என்பதை நீங்கள் அறிந்துகொள்ள வேண்டும்” என்று கர்த்தர் கூறியதை யோவான் 10:38 இல் எடுத்துரைக்கிறது. ஆகவே, தேவனுடைய பிரசன்னம் அங்கே இருக்கிறது என்று விசுவாசியுங்கள். உங்களால் கிரியைகளை விசுவாசித்துவிட்டு, பிரசன்னத்தை விசுவாசிக்காமல் இருக்க முடியுமா? முதலில் பிரசன்னம் இல்லையென்றால், கிரியைகள் எங்கிருந்து வந்திருக்கும் என்பது பற்றியும் சற்று சிந்தியுங்கள்.
9. உலகின் தொடக்கத்திலேயே காணப்பட்ட அந்த இரகசியம் எவ்வளவு தொன்மையானது என்பதைக் கவனியுங்கள். ஆதியாகமம் 1:2-ல், “பூமியானது வெறுமையாக இருந்தது; தண்ணீரின்மேல் இருள் சூழ்ந்திருந்தது. தேவ ஆவியானவர் அந்தத் தண்ணீரின்மேல் அசைவாடிக்கொண்டிருந்தார்” என்று சொல்லப்படுகிறது. தண்ணீரின்மேல் அசைவாடிக்கொண்டிருந்தவர் அவற்றின்மேல் கிரியை செய்துகொண்டும் இருந்தார் அல்லவா? அவர் பிரசன்னமாக இருந்த காரணத்தால் தான் அவர் அசைந்துகொண்டிருந்தார் என்று நாம் சொல்லலாம். அதேநேரம் அவர் அசைந்துகொண்டிருந்தபோதே கிரியையும் கைக்கொண்டிருந்தார் அல்லவா? அப்போது அவர் உலகத்தை சிருஷ்டித்தபடியே இருந்தார் என்பதை உணருங்கள். கர்த்தருடைய வார்த்தையினால் வானங்கள் உண்டாயின என்றும், அவற்றுக்கான வல்லமை அவருடைய வாயின் ஆவியிலிருந்து வந்தது என்றும் தீர்க்கதரிசி கூறுகிறார். இந்த இரண்டு கருத்துக்களுமே தீர்க்கதரிசியின் சாட்சியத்திலிருந்து வருகின்றன: அவர் அசைவாடிக் கொண்டிருந்தார் என்று மோயீசன் கூறும் அதேவேளை, அவர் கிரியை செய்துகொண்டிருந்தார் என்று தாவீது கூறுகிறார்.
10. நான் மற்றொரு கதையைப் பகிர்ந்துகொள்கிறேன். எல்லா மக்களும் தங்கள் பாவங்களால் கெட்டுப்போயிருந்தார்கள். ஆதியாகமம் 6:3-ல் எழுதப்பட்டுள்ளபடி, “என் ஆவி மனிதர்களுடன் தங்கியிருக்காது, ஏனென்றால் அவர்கள் சரீர வடிவமாயிருக்கிறார்கள்” என்று தேவன் கூறினார் என்கிறது. இது, அவர்களுடைய பாவங்களாலும் ஒழுக்கக்கேட்டினாலும் தேவன் தமது கிருபையை விலக்கிக்கொள்கிறார் என்பதைக் காட்டுகிறது. இதைச் சரிசெய்ய தேவன் ஒரு பெருவெள்ளத்தை அனுப்பி, நீதிமானான நோவாவைப் பேழைக்குள் நுழையுமாறு அறிவுறுத்தினார். வெள்ளம் வடியத் தொடங்கிய பிறகு, நோவா முதலில் ஒரு காகத்தை அனுப்பினார், ஆனால் அது திரும்பி வரவில்லை. பின்னர் அவர் ஒரு புறாவை அனுப்பினார். அது ஒரு ஒலிவ மரத்தின் கிளையுடன் திரும்பி வந்தது. நீங்கள் தண்ணீரையும், பேழை உருவாக்கப்பட்ட மரத்தையும், புறாவையும் தான் பார்க்கிறீர்கள், அப்படியிருக்க, இதன் பின்னணியில் உள்ள அர்த்தத்தை ஏன் நீங்கள் சந்தேகிக்கிறீர்கள்?
11. தண்ணீர் என்பது, எல்லாப் பாவச் செயல்களும் சுத்திகரிக்கப்படுவதற்காக, நாம் சரீரத்தை மூழ்கி எடுக்கப் பயன்படுத்தும் ஒன்றாகும். எல்லாத் தவறுகளும் அங்கே புதைக்கப்படுகின்றன. மரம் என்பது, கர்த்தராகிய இயேசு நமக்காகப் பாடுபட்டபோது அறையப்பட்ட சிலுவையைக் குறிக்கிறது. புறா என்பது, நீங்கள் புதிய ஏற்பாட்டில் வாசித்தபடி இறங்கி வந்து, உங்களுக்குச் சமாதானத்தையும் அமைதியையும் கொண்டுவரும் பரிசுத்த ஆவியானவரைக் குறிக்கிறது. காகம் என்பது பாவத்தின் உருவகம்; உங்களிடம் உள்ளும் புறமும் நீதி காக்கப்பட்டால், அது புறப்பட்டுச் சென்றுவிடும், மீண்டும் திரும்புவதில்லை.
12. “சகோதர சகோதரிகளே, மோயீசனைப் பின்பற்றிய நமது முன்னோர்களுக்கு நேர்ந்தது என்னவென்று நீங்கள் அறிந்துகொள்ளுங்கள்: அவர்கள் எல்லாரும் மேகத்தின் கீழ் இருந்தார்கள். அவர்கள் அனைவரும் கடல்வழியே கடந்து சென்றார்கள். அந்த மக்கள் எல்லாரும் மேகத்திலும் கடலிலும் மோயீசனோடு காணப்பட்ட நல்லுறவின் காரணமாக ஞானஸ்நானம் பெற்றுக்கொண்டனர்” என்று 1 கொரிந்தியர் 10:1-2 கூறுகிறது. மேலும், யாத்திராகமம் 15:10-ல், “நீர் அவர்கள் மேல் ஊதி, கடலால் அவர்களை மூடினீர்” என்று சொல்லப்பட்டுள்ளது. எகிப்தியர்கள் மரித்து, எபிரேயர்கள் காப்பாற்றப்பட்ட அந்த எபிரேயர்களின் கதையிலேயே திருமுழுக்கு ஏற்கனவே குறியீடாகக் காட்டப்பட்டது என்பதை இது காட்டுகிறது. குற்றவுணர்ச்சி கழுவப்பட்டு, தவறுகள் அகற்றப்பட்டு, அதே சமயம் நற்பண்பும் களங்கமின்மையும் பாதுகாப்பாக இருக்கின்றன என்பதை இந்த அருட்சாதனம் நமக்குக் கற்பிக்கிறது.
13. நம்முடைய பிதாக்கள் ஒரு ஆறுதலான மேகத்தால் பாதுகாக்கப்பட்டார்கள் என்றும், அது அவர்களுடைய தீவிர இச்சைகளைத் தணிக்க உதவியது என்றும் நீங்கள் அறிவீர்கள். பரிசுத்த ஆவியானவர் சந்திக்கும் மனிதர்களை இந்தக் கனிவான மேகம் மூடுகிறது. இறுதியாக, அது கன்னி மரியாளின் மேல் சூழ்ந்தது. லூக்கா 1:35-ல் விவரிக்கப்பட்டு ள்ளபடி, மனிதகுலத்தை இரட்சிக்கும் இயேசுவின் தாயாக மரியாள் ஆனபோது, தேவனுடைய வல்லமை அவள் மீது வந்தது. இந்த அற்புதம் மோயீசனின் மூலம் அடையாளப்படுத்தப்பட்டது. அந்த அடையாளத்தில் பரிசுத்த ஆவியானவர் பிரசன்னமாக இருந்தபடியால், அவர் நிச்சயமாக உண்மையிலும் பிரசன்னமாக இருக்கிறார். ஏனெனில், யோவான் 1:17-இன் படி, வேதாகமம் ‘மோயீசன் மூலம் சட்டங்கள் கொடுக்கப்பட்டன, ஆனால் இயேசு கிறிஸ்துவின் மூலமாகவே கிருபையும், உண்மையும் வந்தன’ என்று நமக்குச் சொல்கிறது.
14. மாரா மிகவும் கசப்பான தண்ணீருடைய ஊற்றாக இருந்தது: மோயீசன் அதில் விறகுகளைப் போட்டதும், தண்ணீர் இனிப்பானது. கர்த்தருடைய சிலுவையின் செய்தியுடன் தொடர்பில்லாத தண்ணீர் எதிர்கால இரட்சிப்புக்கு உதவாது. இருப்பினும், இரட்சிக்கும் சிலுவையின் இரகசியத்தால் தண்ணீர் ஆசீர்வதிக்கப்பட்ட பிறகு, அது ஆவிக்குரிய ஞானஸ்நானத்திற்கும் இரட்சிப்பின் பாத்திரத்திற்கும் பயனுள்ளதாகிறது. தீர்க்கதரிசியான மோயீசன் கசப்பான தண்ணீரில் விறகுகளை இட்டது போலவே, பாதிரியாரும் ஞானஸ்நானத் தொட்டியின் மேல் ஆண்டவரின் சிலுவையைக் குறித்துப் பேசுகிறார், அதனால் கிருபையின் நிமித்தம் தண்ணீர் இனிமையாகிறது.
15. உங்கள் புறக் கண்களால் நீங்கள் காண்பதை முழுமையாக நம்பிவிடக்கூடாது. உங்கள் அகக் கண்களால் காண்பவை தான் பெரும்பாலும் மிகவும் உண்மையானவை மற்றும் நித்தியமானவை. ஏனெனில் புறக்கண்களில் நீங்கள் காண்பவை யாவும் நிலையற்றவை. இந்த உண்மையை உங்கள் கண்களால் மட்டுமல்ல, உங்கள் மனதாலும் ஆன்மாவின் சக்தியாலும் உணர முடியும்.
16. இறுதியாக, இராஜாக்களிடமிருந்து கற்றுக்கொண்ட பாடங்கள் உங்களுக்கு வழிகாட்டட்டும். நாமான் ஒரு சிரிய தேசத்தவன். தொழுநோயால் பாதிக்கப்பட்டிருந்த அவனை யாராலும் குணப்படுத்த முடியவில்லை. அப்பொழுது, சிறைப்பட்டவர்களின் மத்தியில் இருந்த ஒரு இளம் பெண், இஸ்ரவேலில் உள்ள ஒரு தீர்க்கதரிசியால் அவனைக் குணப்படுத்த முடியும் என்று சொன்னாள். உடனே அவன் வெள்ளியையும் பொன்னையும் எடுத்துக்கொண்டு இஸ்ரவேலின் அரசனிடம் சென்றான். நாமான் வந்திருக்கும் காரணத்தை அரசன் வினவியபோது, அவன் தன் ஆடைகளைக் கிழித்துக்கொண்டு, இராஜாக்கள் கையாளக்கூடாத காரியங்களைக் குறித்து விசாரித்ததால், தன்னைக் குறை கூறுவதற்கு அவர்கள் காரணங்களைத் தேடுகிறார்கள் என்று கூறினான். இருப்பினும், தீர்க்கதரிசியான எலிசா, இஸ்ரவேலில் ஒரு தேவன் இருக்கிறார் என்பதை நாமான் அறிந்துகொள்ளும்படி, அவனைத் தன்னிடம் அனுப்புமாறு அரசனுக்கு ஒரு செய்தியை அனுப்பினார். நாமான் வந்தபோது, யோர்தான் நதியில் ஏழு முறை தன்னைக் கழுவும்படி எலிசா அவனிடம் கூறினார்.
17. அப்பொழுது, தன் சொந்த நாட்டில் இதைவிடச் சிறந்த தண்ணீர் இருப்பதாகவும், அதில் தான் அடிக்கடி குளித்திருந்தும் தன் தொழுநோயிலிருந்து ஒருபோதும் குணமடையவில்லை என்றும் அவன் தனக்குள்ளே எண்ணத் தொடங்கினான். இவ்வாறு எண்ணியவன், தீர்க்கதரிசியின் கட்டளையைப் பின்பற்றுவதைக் கைவிட்டான். ஆயினும், அவனுடைய ஊழியர்கள் அவனை ஊக்குவித்தனர். அதன் பிறகு அவன் அந்தத் தண்ணீரில் மூழ்கித் தன்னை கழுவிக்கொள்ளத் தீர்மானித்தான். உடனடியாக, அவன் குணமடைந்தான். உடனேயே தன்னைச் சுத்திகரித்தது தண்ணீர் அல்ல, கிருபையே என்பதை அவன் உணர்ந்துகொண்டான்.
18. சிறைப்பட்டவர்களிடையே இருக்கும் அந்த இளம் பணிப்பெண் யார் என்பதை இப்போது நீங்கள் புரிந்துகொள்ளவேண்டும். அவள், ஒரு காலத்தில் பாவத்தில் சிக்குண்டு, கிருபையின் சுதந்திரம் இல்லாதிருந்த தேவனுடைய சபையைக் குறிப்பவளாக இருக்கிறாள். புறஜாதியார் அவளுடைய வழிகாட்டுதலின் மூலம், முன்பு தாங்கள் உறுதியாக இல்லாதிருந்த தீர்க்கதரிசனத்தை கேட்டார்கள். பின்னர், அதைப் பின்பற்ற வேண்டும் என்று அவர்கள் விசுவாசித்தபோது, தங்கள் எல்லாப் பாவங்களிலிருந்தும் அவர்கள் சுத்திகரிக்கப்பட்டார்கள். அவர் குணமடைவதற்கு முன்பு சந்தேகம் கொண்டிருந்தார், ஆனால் அவர் ஏற்கனவே குணமடைந்துவிட்டார், எனவே அதையிட்டு அவர் சந்தேகம் கொள்ளத் தேவையில்லை.
அத்தியாயம் 4
யோவானின் சாட்சியமும், திருவருட்சாதனம் செய்யப்படும் விதமும், தண்ணீர் மட்டும் தூய்மைப்படுத்தாது என்பதைக் காட்டுகின்றன; இதற்கு ஆவியானவரது பிரசன்னம் தேவை. நற்செய்தியில் காட்டப்பட்டுள்ள குளத்தாலும் அங்கு குணமாக்கப்பட்ட மனிதராலும் இது உறுதியாகிறது. அதே பகுதி, கிறிஸ்துவின் திருமுழுக்கின்போது தூய ஆவியானவர் உண்மையிலேயே அவர்மீது இறங்கினார் என்பதையும் காட்டுவதோடு, இந்த தேவ இரகசியத்தின் பொருளையும் விளக்குகிறது.
19. நாம் முழுமையாகப் புரிந்துகொள்ள முடியாத ஆழமான இரகசியங்கள் இருப்பதால், நீங்கள் காண்பதை மட்டும் நம்ப வேண்டாம் என்று உங்களுக்கு அறிவுறுத்தப்பட்டது. “தேவன் தன்னை நேசிக்கும் மக்களுக்காகச் செய்த ஏற்பாட்டை எந்த கண்ணும் பார்க்கவில்லை. எந்தக் காதும் கேட்கவில்லை, எந்த மனிதனும் எண்ணிப் பார்த்ததில்லை” என்று 1 கொரிந்தியர் 2:9 இல் விளக்கப்பட்டுள்ளது. ஆகவே, இந்த இரகசியங்கள் நாம் காணாத அல்லது கேட்காதவை மற்றும் அவை நமது கற்பனைக்கு அப்பாற்பட்டவை. நான் ஒவ்வொரு நாளும் பார்த்துப் பழகிய தண்ணீரைப் பார்த்தும், நான் பலமுறை குளித்தும் சுத்தமாக உணராத அதே தண்ணீர் இதுதானா? என்று கேட்காத தோன்றுகிறது. ஆகவே ஆவியானவரின் பிரசன்னம் இல்லாமல் தண்ணீர் தன்னை சுத்திகரித்துக் கொள்ள முடியாது என்பதை இது காட்டுகிறது.
20. திருமுழுக்கில் உள்ள மூன்று சாட்சிகளான தண்ணீர், இரத்தம், மற்றும் ஆவி. இதுகுறித்து 1 யோவான் 5:7 இல் “இயேசுவைக் குறித்து நமக்குக் கூறும் மூன்று சாட்சிகள் இருக்கின்றன” என்று சாட்சியமளிக்கிறது. ஆகவே இந்த மூன்று சாட்சிகளும் ஒன்றோடொன்று தொடர்புடையன. இவற்றில் இருந்து ஒன்றை நீங்கள் நீக்கினால் கூட, திருமுழுக்கு முழுமைபெறாது. கிறிஸ்துவின் சிலுவை இல்லாமல் தண்ணீர் மட்டும் இருந்தால் போதாது; அதற்குத் தனியாக எந்தச் சிறப்பு அர்த்தமும் இல்லை. மேலும், தண்ணீர் இல்லாமல் மறுபிறப்புக்கான அருட்சாதனத்தைப் பெற முடியாது. யோவான் 3:5-ல், “ஒருவன் நீரில் இருந்தும் ஆவியில் இருந்தும் பிறக்க வேண்டும். இவற்றிலிருந்து பிறக்காவிடில் அவனால் தேவனின் இராச்சியத்துக்குள் நுழைய முடியாது” என்று சொல்லப்பட்டுள்ளது. விசுவாசத்தைக் கற்றுக்கொள்ளும் ஒருவர் கூட இயேசுவின் சிலுவையை விசுவாசித்து, அதை ஏற்றுக் கொண்டு, அதனால் முத்திரையிடப்படுகிறார். எப்படியிருந்தாலும், பிதா, குமாரன், பரிசுத்த ஆவியின் நாமத்தில் திருமுழுக்கு பெறாமல் அவர்கள் தங்கள் பாவங்களுக்கு மன்னிப்பைப் பெறவோ அல்லது ஆன்மீக அருளைப் பெறவோ முடியாது.
21. முன்னே நாம் கூறிய அந்தச் சிரிய தேசத்தவன் நியாயப்பிரமாணத்திற்கு இணங்க, தன்னை ஏழு முறை தண்ணீரில் மூழ்கி எழுந்தான். ஆனால் நீங்களோ திரித்துவத்தின் நாமத்தில் ஞானஸ்நானம் பெற்றீர்கள். பிதா, குமாரன், பரிசுத்த ஆவியானவர் மீதுள்ள உங்கள் விசுவாசத்தை அறிக்கையிட்டீர்கள். நீங்கள் செய்ததை நினைவுகூருங்கள்: திரித்துவத்தின் ஒவ்வொரு பொருளையும் அறிக்கையிட்டீர்கள். உங்கள் விசுவாசத்தின் வரிசையைக் கவனியுங்கள்: நீங்கள் உலக வாழ்விலிருந்து மரித்து, தேவனுடன் மீண்டும் உயிர்த்தெழுந்தீர்கள். நீங்கள் தண்ணீரில் அடக்கம் செய்யப்பட்டது போல, பாவத்தின் நிமித்தம் மரித்து, நித்திய ஜீவனின் கிருபையால் மீண்டும் உயிர்த்தெழுந்தீர்கள். ஆகையால், இந்தத் தண்ணீருக்கு உண்மையான வல்லமை உண்டு என்று விசுவாசியுங்கள்.
22. ஆகவே, கர்த்தருடைய தூதன் குறிப்பிட்ட காலங்களில் குளத்திற்குள் இறங்கி வருவான் என்றும், அதனால் தண்ணீர் கலங்கும் என்றும் சொல்லப்படுகிறது. யோவான் 5:4-ல் குறிப்பிடப்பட்டுள்ளபடி, தண்ணீர் கலங்கிய பிறகு குளத்திற்குள் முதலில் இறங்குபவர், தனக்கு என்ன நோய் இருப்பினும், அந்த நோயிலிருந்து குணமடைவார். இந்தக் குளம் எருசலேமில் இருந்தது; ஒவ்வொரு வருடமும் ஒருவர் குணமடைவார். இருப்பினும், தேவதூதன் குளத்துக்குள் இறங்கி வரும் வரை அதில் இறங்கிய எவரும் குணமடையவில்லை. அவிசுவாசிகளுக்கு தண்ணீர் அசைவது தான் தேவதூதன் வந்ததற்கான அடையாளமாக இருந்தது. அவர்களுக்குத் தண்ணீர் அசைந்தது தான் அடையாளமாகக் கிடைத்தது. உங்களுக்கோ விசுவாசம் உண்டு; பரிசுத்த ஆவியானவர் உங்களுக்கென்று இருக்கிறார்; இதன்மூலம் கர்த்தராகிய கிறிஸ்து தாமே உங்களுக்காகக் கிரியை செய்கிறார்.
23. ஒருவர் குணமாக்கப்பட்டார், இப்பொழுது அனைவரும் குணமாக்கப்பட்டனர்; அல்லது இன்னும் துல்லியமாகச் சொல்வதானால், கிறிஸ்தவ மக்கள் அனைவரும் குணமாக்கப்பட்டனர், எரேமியா 15:1-ல் குறிப்பிடப்பட்டுள்ளபடி, தண்ணீர் வஞ்சகமானது. விசுவாசம் கொள்ளாதோரை ஞானஸ்நானம் குணமாக்குவதில்லை; மாறாக அது மாசுபடுத்துகிறது. உயிரற்ற பொருட்களுக்குக் குற்ற உணர்வோ அல்லது கிருபையோ இருக்க முடியும் என்று நினைத்து, யூதன் பானைகளையும் கோப்பைகளையும் சுத்தம் செய்கிறான். அதற்குப் பதிலாக, உங்கள் நற்செயல்கள் பிரகாசித்து உங்கள் கிருபையைப் பிரதிபலிக்கும் வகையில், உங்கள் சொந்த வாழ்க்கையைத் தூய்மைப்படுத்துவதில் கவனம் செலுத்துங்கள். அந்த ஞானஸ்நானத் தொட்டியானது அதன் மீது கடவுளின் வல்லமை எவ்வாறு இறங்கி வருகிறது என்பதை அடையாளப்படுத்துகிறது.
24. முடிவில், அந்த பாரிசவாத நோயாளி விசேடமான ஒருவருக்காகக் காத்திருந்தான். அவர், கன்னி மரியாவிடம் இருந்து பிறந்த கர்த்தராகிய இயேசுவைத் தவிர வேறு யாராக இருக்கமுடியும்? அவர் வந்தபோது, மக்கள் ஒவ்வொருவராக அல்ல, ஒரே நேரத்தில் அனைவரும் குணமடைவார்கள். இவர்தான் அனைவரும் எதிர்பார்த்துக் காத்திருந்தவர். யோவான் 1:33 இல், “யார் மீது பரிசுத்த ஆவியானர் இறங்கி அமர்வதைக் காண்கிறாயோ, அவர்தான் பரிசுத்த ஆவியானவர் பெயரால் ஞானஸ்நானம் கொடுக்கிறவர் என்று பிதா ஸ்நாபக யோவானிடம் கூறினார்” என்று கூறுகிறது. அதேபோல, யோவான் 1:32 இல் “ஆவியானவர் பரலோகத்திலிருந்து இறங்கி வருவதைப் பார்த்தேன். அவர் ஒரு புறாவைப்போல் இறங்கி இயேசுவின் மீது அமர்ந்தார்” என்று யோவான் சாட்சி கூறினார். நோவாவின் பேழையிலிருந்து அனுப்பப்பட்ட புறா, பரிசுத்த ஆவியானவர் வடிவில் வந்த புறாவின் ஒரு குறியீடு என்பதை நீங்கள் புரிந்துகொண்டு அடையாளம் கண்டுகொள்வதற்காக, ஆவியானவர் ஒரு புறாவைப் போல இறங்கினார்; இது திருவருட் சாதனத்துடனான தொடர்பைக் காண உங்களுக்கு உதவுகிறது.
25. நீங்கள் ஆச்சரியப்படலாம்; ஒரு உண்மையான புறா அனுப்பப்பட்டது ஒருபுறமிருக்க, ஆவியானவர் ஒரு புறாவைப் போல இறங்கி வந்ததால், அந்தப் புறா வெறும் சாயல் என்றும் ஆவியானவர் உண்மையானவர் என்றும் நாம் எப்படிச் சொல்ல முடியும்? கிரேக்க மொழியில், ஆவியானவர் ஒரு புறாவின் சாயலில் வந்தார் என்று சொல்லப்பட்டுள்ளது. ஆனால், என்றென்றும் நிலைத்திருக்கும் தேவனை விட உண்மையானது எது? புறா என்பது ஒரு உயிரினம் மட்டுமே, எனவே அது உண்மையான யதார்த்தமாக இருக்க முடியாது; அது எளிதில் மாறக்கூடிய அல்லது மறைந்து போகக்கூடிய ஒரு சாயல் மட்டுமே. மேலும், ஞானஸ்நானம் பெறுபவர்களின் எளிமை உண்மையானதாக இருக்க வேண்டும், வெறும் வெளிவேடமாக இருக்கக்கூடாது. மத்தேயு 10:16-ல் ‘சர்ப்பங்களைப் போல விவேகமுள்ளவர்களாகவும், புறாக்களைப் போல எளிமையான குணமுள்ளவர்களாகவும் இருக்கும்படி’ கர்த்தர் நமக்குச் சொல்கிறார். எனவே, புறாக்களைப் போல எளிமையாக இருக்க வேண்டும் என்பதை நமக்கு நினைவூட்டுவதற்காக அவர் ஒரு புறாவைப் போல இறங்கி வந்தார் என்பது அர்த்தமுள்ளதாக இருக்கிறது. சாயல் யதார்த்தத்தைக் குறிக்க முடியும் என்பதையும் நாம் காண்கிறோம். கிறிஸ்துவைப் பற்றிப் பேசும்போது: “மனிதனாக அவர் வாழும்போது தேவனுக்கு முன்பு கீழ்ப்படிந்தவராக இருந்தார். மரணம் வரைக்கும் அவர் பணிவுள்ளவராக இருந்தார். முடிவில் சிலுவையிலே இறந்தார்” என்று பிலிப்பியர் 2:8 இலும், பிதாவாகிய தேவனைக் குறித்து யோவான் 5:37-ல் “என்னை அனுப்பிய என் பிதா, என்னைப் பற்றி அவரே சாட்சி தருகிறார். ஆனால் நீங்கள் அவர் சத்தத்தை ஒருபொழுதும் கேட்டதில்லை. அவர் எப்படி இருப்பார் என்று நீங்கள் பார்த்ததும் இல்லை” என்று கூறப்பட்டுள்ளது.
அத்தியாயம் 5
ஞானஸ்நானத்தில் கிறிஸ்து உண்மையாகவே பிரசன்னமாக இருக்கிறார். அதனால் அந்தச் சடங்கைச் செய்பவர்களை நாம் கவனத்தில் கொள்ளத் தேவையில்லை. ஞானஸ்நானத்திற்குத் தயாராகும் நபர்களால் பொதுவாகக் கூறப்படும் திரித்துவ அறிக்கையின் ஒரு சுருக்கமான விளக்கம் இங்கே கொடுக்கப்பட்டுள்ளது.
26. “வானத்திலிருந்து ஒரு குரல், “இவரே (இயேசு) என் குமாரன். நான் இவரை நேசிக்கிறேன். நான் இவரிடத்தில் பிரியமாயிருக்கிறேன்” எனக் கூறியது” என்று மத்தேயு 3:17 இல் சான்றளிக்கிறது. ஆகவே இதுகுறித்து சந்தேகிப்பதற்கு ஏதேனும் காரணம் இருக்கிறதா? புறாவின் வடிவில் பரிசுத்த ஆவியுடன் காணப்பட்ட குமாரன் பேசும்போதும் இதுபற்றிக் கூறியிருக்கிறாரே? தாவீதும் இதுபற்றிக் கூறுகையில், ‘கடலின்மேல் கர்த்தர் தமது குரலை எழுப்புகிறார். மகிமைபொருந்திய தேவனுடைய குரல் பெரும் சமுத்திரத்தின்மேல் இடியாய் முழங்கும்’ என்றும், ‘ஜெருபால் செபித்தபோது வானத்திலிருந்து அக்கினி இறங்கி வந்தது’ என்று நியாயாதிபதிகள் 6:21 இலும், ‘எலியா ஜெபித்தபோது அவருடைய பலியை ஆசீர்வதிக்க நெருப்பு அனுப்பப்பட்டது’ என்றும் வேதாகமம் சான்றளிக்கிறது.
27. தனிநபர்களின் தகுதிகளைக் கருத்தில் கொள்ளாது, குருக்களின் பணியைக் கருத்தில் கொள்ளுங்கள். அப்படி நீங்கள் அவர்களின் குணங்களைக் கருத்தில் கொள்ள விரும்பினால், குருவை எலியாவாக எண்ணிப் பாருங்கள். கர்த்தராகிய இயேசுவிடமிருந்து தாங்கள் பெற்ற இந்த தேவ இரகசியத்தை நம்முடன் பகிர்ந்துகொண்ட பேதுரு மற்றும் பவுலைப் பற்றியும் நீங்கள் சிந்திக்கலாம். முற்காலத்தில், மக்கள் விசுவாசிப்பதற்கு உதவும் வகையில் கண்ணுக்குப் புலப்படும் வகையில் அக்கினி அனுப்பப்பட்டது; விசுவாசம் உள்ள நமக்கோ, ஆண்டவர் நாம் காண முடியாத வழிகளில் செயல்படுகிறார். அப்போது நடந்தது அவர்களுக்கு ஒரு அடையாளமாகவும், நமக்கு ஒரு எச்சரிக்கையாகவும் இருந்தது. ஆகவே, குருவானவர் அவரைக் கூப்பிடும்போது ஆண்டவராகிய இயேசு பிரசன்னமாக இருக்கிறார் என்று விசுவாசியுங்கள். மத்தேயு 18:20-ல், “இரண்டு மூன்று பேர் என்னில் விசுவாசம் வைத்துக் கூடினால் அவ்விடத்தில் நான் இருப்பேன்” என்று அவர் கூறியதாகக் கூறுகிறது. திருச்சபையிலும் தமது அருட்சாதனங்களிலும் அவர் எவ்வளவு அதிகமாகப் பிரசன்னமாக இருக்கிறார் என்பது இதன்மூலம் தெட்டத்தெளிவாகிறது!
28. நீங்கள் தண்ணீருக்குள் இறங்கியபின், உங்களை நோக்கிக் கேட்கப்பட்ட கேள்விகளுக்கு நீங்கள் அளித்த பதில்களை நினைவுகூருங்கள். நீங்கள் பிதா, குமாரன், மற்றும் பரிசுத்த ஆவியானவரை விசுவாசிப்பதாகக் கூறினீர்கள். இதன் பொருள், நீங்கள் அவர்களை வெவ்வேறு நிலைகளாக விசுவாசிக்கவில்லை; மாறாக, நீங்கள் பிதாவை விசுவாசிப்பது போலவே குமாரனையும் விசுவாசிக்க வேண்டும், குமாரனை விசுவாசிப்பது போலவே பரிசுத்த ஆவியானவரையும் விசுவாசிக்க வேண்டும். ஒரே ஒரு வித்தியாசம் என்னவென்றால், நீங்கள் கர்த்தராகிய இயேசுவின் சிலுவை அடையாளத்தை மட்டுமே விசுவாசிக்கிறீர்கள் என்று அறிக்கையிட வேண்டும்.
அத்தியாயம் 6
ஞானஸ்நானம் பெறுபவர்களின் தலைகளில் ஏன் தைலம் பூசப்படுகிறது என்பது குறித்தும், ஞானஸ்நானத்திற்குப் பிறகு அவர்களுடைய பாதங்கள் ஏன் கழுவப்படுகின்றன என்பது பற்றியும், ஒவ்வொரு சந்தர்ப்பத்திலும் என்னென்ன பாவங்கள் மன்னிக்கப்படுகின்றன என்பது குறித்து விளக்கங்களை இங்கே பார்ப்போம்.
29. இதற்குப் பிறகு பாதிரியாரிடம் சென்ற நீங்கள், அடுத்து என்ன நடந்தது என்று கொஞ்சம் சிந்தித்துப் பாருங்கள். உங்கள் தலையின்மேல் பூசப்பட்ட அந்தத் தைலம் தாவீது குறிப்பிடும் அந்தத் தைலம் அல்லவா? அந்தத் தைலம் ஆரோனின் தாடி வரை வழிந்தோடியது அல்லவா? “உமது வாசனைத் திரவியங்கள் அற்புதமானவை, ஆனால் உமது நாமம் சிறந்த வாசனைப் பொருட்களைவிட இனிமையானது. அதனால்தான் இளம் பெண்கள் உம்மை விரும்புகின்றனர்” என்று சொலமன் உன்னதப் பாட்டு 1:2 இல் குறிப்பிட்ட அந்தத் தைலமும் இதுவே. அதேபோல, “என்னை இழுத்துக்கொள்ளும் உமக்குப் பின்னே ஓடி வருவோம்; நாங்கள் உமக்குள் களிகூர்ந்து மகிழுவோம்; திராட்சரசத்தைப் பார்க்கிலும் உமது நேசத்தை நினைப்போம்; உத்தமர்கள் உம்மை நேசிக்கிறார்கள்” என்று உன்னதப் பாட்டு 1:3 இல் மீண்டும் இதுபற்றிக் கூறப்பட்டுள்ளது. ஆண்டவராகிய இயேசுவே, இன்று எத்தனை ஆத்மாக்கள் உம்மை நேசித்து, உம்மால் புதுப்பிக்கப்பட்டிருக்கிறார்கள்; அதன்மூலம் தான் அவர்கள் உமது உயிர்த்தெழுதலின் நறுமணத்தை அனுபவிக்க முடியும்.
30. இது ஏன் செய்யப்படுகிறது என்று சிந்தித்துப் பாருங்கள். பிரசங்கி 2:14 ‘ஞானமுள்ளவன் தான் செல்லுமிடத்தை அறிய சிந்தனையைக் கண்களாகப் பயன்படுத்துகிறான்’ என்கிறது. அபிஷேகம் செய்யப்பட்ட தைலம் வாலிபத்தின் அழகைக் குறிக்கும் விதமாகத் தாடிவரை வழிந்தோடுகிறது. ஆரோனின் தாடியானது நாமும் ஒரு விசேஷித்த குழுவாக, பரிசுத்தமானவர்களாகவும், மதிப்புமிக்கவர்களாகவும் இருக்க முடியும் என்பதை அடையாளப்படுத்துகிறது. நாம் அனைவரும் தேவனுடைய இராச்சியத்தின் ஒரு பகுதியாக இருப்பதற்கும் பாதிரியார்களாகப் பணிபுரிவதற்கும் ஆவிக்குரிய வரங்களைப் பெற்றிருக்கிறோம்.
31. நீங்கள் ஞானஸ்நானத் தொட்டியிலிருந்து வெளியேறியவுடன், நற்செய்தி கூறும் பாடத்தை நினைவுகூருங்கள். நம் ஆண்டவராகிய இயேசு கிறிஸ்து தம் சீடர்களின் பாதங்களைக் கழுவினார். அவர் சீமோன் பேதுருவிடம் வந்தபோது, பேதுரு, “ஆண்டவரே, நீர் ஒருபோதும் என் பாதங்களைக் கழுவக்கூடாது” என்றும், அதற்கு கர்த்தர், “நான் உன் கால்களைக் கழுவாவிட்டால், நீ என்னோடு பங்குள்ளவனாக இருக்க முடியாது” என்று கூறினார் என யோவான் 13:8 பதிவு செய்கிறது. இந்தச் செயலின் பின்னணியில் உள்ள அர்த்தத்தைப் பேதுரு புரிந்துகொள்ள வில்லை. கர்த்தர் தன் பாதங்களைக் கழுவ அனுமதிப்பது ஊழியக்காரனின் தாழ்மையைக் காயப்படுத்தும் என்று எண்ணி, அவர் அந்தச் சேவையை மறுத்துவிட்டார். ஆனால் கர்த்தரோ, “நான் உன் பாதங்களைக் கழுவாவிட்டால், நீ என்னில் ஒரு பகுதியாக இருக்க மாட்டாய்” என்று கூறினார். இதைக் கேட்ட பேதுரு, “கர்த்தரே, என் பாதங்களை மட்டுமல்ல, என் கைகளையும் என் தலையையும் கூடக் கழுவும்” என்று பதிலளித்தார். யோவான் 13:9-10-இற்கு அமைவாக, கர்த்தர், “ஒரு மனிதன் ஏற்கனவே குளித்தபிறகு அவனது சரீரம் சுத்தமாகிவிடுகிறது. அதன் பிறகு அவன் கால்களை மட்டும் கழுவினால் போதும்” என்று பதிலளித்தார்.
32. பேதுரு சுத்தமாக இருந்தபோதிலும், அவர் தம் பாதங்களைக் கழுவ வேண்டியிருந்தது. ஏனெனில், சர்ப்பம் முதல் மனிதனை வஞ்சித்து, வீழ்த்தி, அவனைப் பாவம் செய்யத் தூண்டியபோது, அவனிடமிருந்து பரம்பரையாக வந்த பாவம் அவருக்கும் வந்தது. ஆகையால், பரம்பரைப் பாவங்கள் நீக்கப்படுவதற்காக அவருடைய பாதங்கள் கழுவப்பட்டன; ஏனெனில், ஞானஸ்நானத்தின் மூலம் நம்முடைய பாவங்கள் மன்னிக்கப்படுகின்றன.
33. அதே நேரத்தில், தாழ்மையின் இயல்பிலேயே அந்த இரகசியம் அடங்கியுள்ளது என்பதைக் கவனியுங்கள். கிறிஸ்து இதுபற்றி என்ன கூறினார் என்பதையும் பார்ப்போம்: “உங்கள் ஆண்டவரும் போதகருமான நானே உங்கள் பாதங்களைக் கழுவினேன் என்றால், நீங்கள் ஒருவருக்கொருவர் உங்கள் பாதங்களை எவ்வளவு அதிகமாகக் கழுவ வேண்டும்?” என்ற கேள்வியையும் எழுப்பியுள்ளார். இரட்சிப்பின் அதிபதியானவர் தமது கீழ்ப்படிதலின் மூலம் நம்மை இரட்சித்த காரணத்தால், அவருடைய ஊழியர்களாகிய நாமும் ஒருவருக்கொருவர் ஊழியம் செய்வதன் மூலம் நமது தாழ்மையையும் கீழ்ப்படிதலையும் வெளிப்படுத்த வேண்டிய கடப்பாட்டைக் கொண்டிருக்கிறோம்.
அத்தியாயம் 7
ஞானஸ்நானம் பெறுவோர் அணியும் வெண்ணிற அங்கி பாவங்கள் கழுவப்படுதலைக் குறிக்கிறது, இதனாலேயே திருச்சபை தன்னைக் கருமையானவள் என்றும் அழகானவள் என்றும் கூறுகிறது. ஆண்டவரின் திருவுடலின் அழகைக் கண்டு வியப்பதுபோல, தேவதூதர்கள் திருச்சபையின் பிரகாசத்தைக் கண்டு வியக்கிறார்கள். மேலும், கிறிஸ்து திருச்சபையைத் தனது அழகான மணவாட்டி என்று ஒப்பிட்டுப் புகழ்ந்துரைத்தார். இதன்மூலம் ஒருவருக்கொருவர் கொண்டிருந்த பரஸ்பர அன்பு விவரிக்கப்பட்டுள்ளது.
34. இதற்குப் பிறகு, நீங்கள் பாவத்தின் கறைகள் நீங்கியவர்களாய், களங்கமற்ற தூய முக்காட்டை அணிந்துகொள்கிறீர்கள் என்பதைக் குறிக்கும் முகமாக, தூய வெள்ளை ஆடைகளைப் பெறுகிறீர்கள். தீர்க்கதரிசி கூறினார், “நீர் என்மீது ஈசோப்பைத் தெளிப்பீர், அப்பொழுது நான் தூய்மையாக்கப்படுவேன்; நீர் என்னைக் கழுவுவீர், அப்பொழுது நான் பனியைவிட வெண்மையாவேன்.” திருச்சட்டத்தின்படியும் நற்செய்தியின்படியும், திருமுழுக்கு பெற்ற ஒருவர் தூய்மையாக்கப் பட்டவராகக் கருதப்படுகிறார். ‘மோயீசன் ஆட்டுக்குட்டியின் இரத்தத்தின்மீது ஈசோப்பைத் தோய்த்து எடுத்து வாசல் நிலைக்கால்களின் பக்கங்களிலும், மேலேயும் தெளித்தார்’ என்கிறது யாத்திராகமம் 12:22. நற்செய்தி, ‘கிறிஸ்து தமது உயிர்த்தெழுதலின் மகிமையை வெளிப்படுத்தியபோது, அவருடைய ஆடைகள் பனியைப் போல வெண்மையாக இருந்தன. எனவே, பாவங்கள் மன்னிக்கப்பட்ட ஒருவர் பனியைவிட வெண்மையாகிறார்’ என்கிறது. கர்த்தர் ஏசாயாவின் மூலம் பேசுகையில், “உங்களது பாவங்கள் இரத்தினக் கம்பளம்போல் சிவப்பாக இருக்கிறது. ஆனால், அவைகள் கழுவப்பட்டு நீங்கள் பனிபோன்று வெண்மையாகலாம். உங்கள் பாவங்கள் பிரகாசமான சிவப்பாக இருக்கின்றன. ஆனால், நீங்கள் வெள்ளை கம்பளியைப் போன்று வெண்மையாக முடியும்” என்று கூறினார்.
35. புதுப்பிக்கப்பட்ட வாழ்வைப் பெற்ற திருச்சபை, உன்னதப்பாட்டு 1:4-ல் பின்வருமாறு கூறுகிறது: “எருசலேமின் பெண்களே! கேதாரின் கூடாரங்களைப்போலவும், சொலமனின் திரைகளைப்போலவும் நான் கறுப்பாக இருந்தாலும், அழகாக இருக்கிறேன்” என்று. அவள் தனது மனித பலவீனங்களால் கறுப்பாகவும், தனது விசுவாசத்தால் அழகாகவும் இருக்கிறாள். இந்த மாற்றத்தைக் கண்ட எருசலேமின் குமாரிகள், வியப்புடன் கேட்கிறார்கள், ‘இப்போது வெள்ளையாக்கப்பட்டு மேலே வருகிற இவர் யார்? (உன்னதப்பாட்டு 8:5 இல்) கறுப்பாக இருந்து திடீரென்று எப்படி அவள் வெள்ளை நிறமாக மாறினாள் என்று அவர்கள் வியக்கிறார்கள்.
36. கிறிஸ்து உயிர்த்தெழுந்தபோது, தேவதூதர்களும் குழப்பமடைந்தார்கள்; ஒரு மனிதன் பரலோகத்திற்கு ஏறிச் செல்வதைக் கண்டபோது, பரலோகவாசிகளும் நிச்சயமற்று இருந்தார்கள். அவர்கள், இந்த மகிமையின் அரசர் யார் என்று கேட்டார்கள். சிலர், அதிபதிகளே, உங்கள் வாசல்களைத் திறவுங்கள்; நித்திய வாசல்களே, உங்கள் உயர்ந்த கதவுகளை அகலத் திறவுங்கள்; மகிமையின் அரசர் உள்ளே வருகிறார் என்றார்கள். ஏசாயா 63:1 இல், பரலோக வல்லமைகள் நிச்சயமற்று, “ஏதோமிலிருந்து வருகிற இவர் யார்? போசோரின் செந்நிற ஆடைகளை அணிந்து, மகத்துவமான ஆடையில் மகிமையுடன் தோன்றும் இவர் யார்?” என்று கேட்டதையும் நாம் காண்கிறோம்.
37. ஆனால் கிறிஸ்து, தீர்க்கதரிசியாகிய சகரியாவின் புத்தகத்தில் நீங்கள் குறிப்பிடுவதுபோல, அழுக்கு ஆடைகளை அணிந்திருந்த தம்முடைய திருச்சபையை, இப்பொழுது வெண்மையான ஆடைகளை அணிந்திருப்பதைக் காண்கிறார். தூய்மையானதும் புதுப்பிக்கப் பட்டதுமான ஓர் ஆன்மாவை அவர் காண்கிறார். மேலும் உன்னதப்பாட்டு 4:1-ல், “இதோ பார், என் அன்பே, நீ அழகாக இருக்கிறாய், பார், நீ மிகவும் அழகாக இருக்கிறாய், உன் கண்கள் புறாவின் கண்களைப் போல இருக்கின்றன” என்று சொல்லப்பட்டிருக்கிறது. பரிசுத்த ஆவியானவர் பரலோகத்திலிருந்து இறங்கி வந்த விதமும் அவ்வாறே இருக்கிறது. அவரது கண்கள் புறாவின் கண்களைப் போல அழகாக இருந்தன, ஏனெனில் பரிசுத்த ஆவியானவர் ஒரு புறாவின் வடிவில் பரலோகத்திலிருந்து இறங்கி வந்தார்.
38. “உன் பற்கள் வெள்ளைப் பெண் ஆட்டுக் குட்டிகள், குளித்து கரையேறுவது போன்றுள்ளன. அவை இரட்டைக் குட்டிகளை ஈன்று, எந்தக் குட்டியையும் இழக்காத ஆட்டினைப்போன்றுள்ளன. உனது உதடுகள் சிவந்த பட்டுக் கயிற்றைப் போன்றுள்ளன. உனது வாய் அழகானது. உனது கன்னங்கள் முக்காட்டின் நடுவே வெட்டி வைக்கப்பட்ட மாதுளம் பழம்போல் உள்ளன” என்று உன்னதப்பாட்டு 4:2-3-ல் கூறப்பட்டுள்ளது. இது ஒரு சிறந்த பாராட்டு. ஆடுகளுடனான ஒப்பீடு மகிழ்ச்சியளிக்கிறது, ஏனெனில் ஆடுகளால் உயரமான இடங்களில் பாதுகாப்பாக மேயவும், கரடுமுரடான பகுதிகளில் உணவைக் கண்டறியவும் முடியும்; மேலும், அவற்றின் உரோமம் கத்தரிக்கப்படும் போது, அவை தேவையற்றவற்றிலிருந்து விடுபடுகின்றன. ஆகவேதான், திருச்சபையானது இந்த மந்தைக்கு ஒப்பிடப்படுகிறது; திருமுழுக்கின் மூலம் தங்கள் பாவங்களைக் கைவிட்டு, ஆண்டவராகிய இயேசுவின் சிலுவையைப் பிரதிபலிக்கும் தங்கள் விசுவாசத்தையும் நற்பண்புகளையும் கிறிஸ்துவுக்கு அர்ப்பணிப்பவர்களின் பல நற்குணங்களையும் அது கொண்டுள்ளது.
39. திருச்சபை மிகவும் வசீகரமாக இருப்பதன் காரணத்தால், வார்த்தையாகிய தேவன் திருச்சபையை நோக்கி, “என் அன்பே, நீ முற்றிலும் அழகாக இருக்கிறாய், உன்னில் எந்தக் குறையும் இல்லை; உன் குற்றம் கழுவப்பட்டுவிட்டது. லெபனானிலிருந்து வா, என் மணவாட்டியே; நீ விசுவாசத்தைக் கடந்து கிறிஸ்துவிடம் செல்வாய்” என்று கூறியதாக உன்னதப்பாட்டு 4:7-8 சான்று பகர்கிறது. இதன் பொருள், உலகத்தைத் துறப்பதன் மூலம், அவள் கிறிஸ்துவிடம் சென்றுவிட்டாள் என்பதாகும். மீண்டும் வார்த்தையாகிய தேவன் அவளிடம், நீ மிகவும் அழகானவள். நீ மனதிற்கு மகிழ்ச்சியைத் தருபவள். நீ அன்பான, மகிழ்வளிக்கிற இளம் கன்னி; நீ பனை மரத்தைப்போன்று உயரமானவள்; உன் மார்பகங்கள் அம்மரத்தில் உள்ள கனிகளைப் போன்றுள்ளன” என்று உன்னதப்பாட்டு 7:6-7 கூறுகிறது.
40. திருச்சபை அவருக்கு பதிலளிக்கும் முகமாக இவ்வாறு கேட்கிறது: “நீர் என் தாயிடம் பால் குடித்த என் இளைய சகோதரனைப்போன்று இருந்தால், நான் உம்மை வெளியில் சந்திக்கும்போது உம்மை முத்தமிட முடியும். இதனைத் தவறு என்று எவரும் சொல்லமாட்டார்கள். நான் உம்மை என் தாயின் வீட்டிற்கு அழைத்துச் செல்வேன். என் தாயின் வீட்டிற்கும், என்னைக் கருத்தரித்தவளின் மறைவிடத்திற்கும் கொண்டு செல்வேன். நீர் எனக்குப் போதிப்பீராக” என்று உன்னதப்பாட்டு 8:1-2 கூறுகிறது. இதிலிருந்து, அவள் அருளின் கொடைகளால் மகிழ்ச்சியுற்று, எவ்வாறு உள்ளார்ந்த இரகசியங்களை அடையவும், தனது முழு அன்பையும் கிறிஸ்துவுக்கு அர்ப்பணிக்கவும் ஏங்குகிறாள் என்பதை நீங்கள் காண்கிறீர்கள். அவள் இன்னும் தேடுகிறாள், இன்னும் அவருடைய அன்பைத் தேடத் தூண்டப்படுகிறாள். மேலும் எருசலேமின் மகள்மாரிடம் தனக்காக அந்த அன்பைத் தூண்டுமாறு கேட்கிறாள். மேலும் விசுவாசமுள்ள ஆன்மாக்களின் வசீகரத்தால், தன் கணவன் அவள் மீது இன்னும் செழுமையான அன்பைக் கொள்ளத் தூண்டப்பட வேண்டும் என்று விரும்புகிறாள்.
41. ஆகையால், இத்தகைய பேரார்வம் கொண்ட அன்பினாலும், பேரழகு மற்றும் கிருபையின் வசீகரத்தாலும் உந்தப்பட்ட ஆண்டவராகிய இயேசு தாமே, இப்பொழுது திருமுழுக்கு பெற்றவர்களை எந்தக் குற்றமும் மாசுபடுத்தமுடியாது என்றபடியால், அவர் திருச்சபையிடம் இவ்வாறு கூறுகிறார்: “என்னை உன்னருகில் வைத்துக்கொள்வாயாக. உன் இதயத்தின்மேல் ஒரு முத்திரையைப்போல் கையில் அணிந்துகொள்வாயாக” என்று உன்னதப்பாட்டு 8:6 கூறுகிறது. அதாவது என் அன்பே, நீ அழகானவள், நீ முற்றிலும் வசீகரம் மிக்கவள், உனக்கு ஒன்றும் குறைவில்லை. உன் இதயத்தின் மேல் என்னை முத்திரையாக வைத்துக்கொள்வாயாக, அதனால் உன் விசுவாசம் திருவருட்சாதனத்தின் முழுமையில் பிரகாசிக்கட்டும். உன் செயல்களும் அவ்வாறே பிரகாசிக்கட்டும். மேலும் அது உன்னை உருவாக்கிய கடவுளின் சாயலை வெளிப்படுத்தட்டும். எந்தத் துன்புறுத்தலும் உன் அன்பைக் குறைக்காதிருக்கட்டும், அதை இந்தத் தண்ணீராலும் அணைக்கவோ, நதிகளாலும் மூழ்கடிக்கவோ முடியாது.
42. ஏசாயா 11:2-ல், ஞானம், புரிதல், ஆலோசனை, திடம், அறிவு, தேவபக்தி மற்றும் தேவபயம் ஆகியவற்றை உள்ளடக்கிய பரிசுத்த ஆவியானவரின் முத்திரையை நீங்கள் பெற்றிருக்கிறீர்கள் என்பதை நினைவுகூருங்கள். நீங்கள் பெற்றதைப் பத்திரமாக வைத்துக் கொள்ளுங்கள். 2 கொரிந்தியர் 5:5-ல் “இதற்காகத்தான் தேவன் நம்மை ஆயத்தம் செய்திருக்கிறார். ஆவி என்னும் அச்சாரத்தைத் தந்து நமக்கு புதிய வாழ்க்கையை உறுதிப்படுத்துகிறார்” என்று கூறப்பட்டுள்ளது. ஆகவே அப்போஸ்தலர் போதித்தபடி, பிதாவாகிய தேவன் உங்களுக்கு முத்திரையிட்டார், கர்த்தராகிய கிறிஸ்து உங்களுக்குப் பெலனைக் கொடுத்தார், தூய ஆவியானவரை உங்கள் இதயத்தில் வைத்தார்.
அத்தியாயம் 8
ஆண்டவரின் பலிபீடத்தின் மறைபொருள் பெருவிழாவைப் பற்றி. எவரும் அற்பமாக எண்ணிவிடக் கூடாது என்பதற்காக, புனித அம்புரோஸ் அது யூதர்களின் புனிதச் சடங்குகளை விட மிகவும் தொன்மையானது என்று காட்டுகிறார். ஏனெனில் அது மெல்கிசேதேக்கின் பலியில் முன்னறிவிக்கப்பட்டிருந்தது. மேலும், அது கிறிஸ்துவின் திருவுடல் என்பதால், மன்னாவை விட மிகவும் உன்னதமானது என்பதையும் அவர் விளக்குகிறார்.
43. சுத்திகரிக்கப்பட்ட மக்கள், விலையுயர்ந்த ஆபரணங்களால் அலங்கரிக்கப்பட்டு, கிறிஸ்துவின் பலிபீடத்திற்குச் சென்று, “நான் தேவனுடைய பலிபீடத்திற்கும், என் இளமைக்கு மகிழ்ச்சியைத் தரும் தேவனிடமும் செல்வேன்” என்று கூறுகிறார்கள். அவர்கள் தங்கள் பழைய தவறுகளைக் களைந்து, பரலோக விருந்தில் இணைந்துகொள்ள ஆவலுடன், ஒரு வீரியம் மிக்க கழுகைப் போலப் புதியவர்களாக உணர்கிறார்கள். அவர்கள் வந்து, பரிசுத்த பலிபீடம் அமைக்கப் பட்டிருப்பதைக் கண்டபோது, “நீர் எனக்காக ஒரு விருந்தை ஆயத்தப்படுத்தியிருக்கிறீர்” என்று ஆர்ப்பரிக்கிறார்கள். மக்கள் பேசியதைப் பற்றி தாவீது கூறுகையில், “கர்த்தர் என் மேய்ப்பர். எனக்குத் தேவையானவை எப்போதும் என்னிடமிருக்கும். அவர் பசுமையான புல்வெளிகளில் என்னை இளைப்பாறச் செய்கிறார். குளிர்ந்த நீரோடைகளருகே அவர் என்னை வழிநடத்துகிறார். அவர் நாமத்தின் நன்மைக்கேற்ப, என் ஆத்துமாவிற்குப் புது வலிமையைத் தருகிறார்” என்கிறார். அத்தோடு மேலும் அவர், “மரணத்தின் இருண்ட பள்ளத்தாக்குகளில் நான் நடந்தாலும் எந்தத் தீமைக்கும் பயப்படமாட்டேன். ஏனெனில் கர்த்தாவே, நீர் என்னோடிருக்கிறீர். உமது கோலும் தடியும் எனக்கு ஆறுதல் நல்கும். கர்த்தாவே, என் பகைவர்களின் முன்னிலையில் என் பந்தியை ஆயத்தமாக்கினீர். என் தலையில் எண்ணெயை ஊற்றினீர். என் பாத்திரம் நிரம்பி வழியச் செய்தீர்; உமது பாத்திரம் அற்புதமானது!” என்று கூறுகிறார்.
44. இப்போது நாம் மிகவும் கவனமாக இருக்க வேண்டும். ஒருவேளை, கண்ணுக்குத் தெரியும் காரியங்களைக் கண்டு (ஏனெனில் கண்ணுக்குப் புலப்படாத காரியங்களை மனிதக் கண்களால் காணவோ, புரிந்து கொள்ளவோ முடியாது). யாத்திராகமம் 16:13 கூறுவதுபோல, ‘தேவன் யூதர்களுக்கு மன்னாவையும் காடைக் குருவிகளையும் மட்டுமே அனுப்பினார்’ என்று கூறிவிடக் கூடாது. மாறாக, தேவன் நேசிக்கும் திருச்சபைக்காக, அவர் ஆயத்தப்படுத்தியிருப்பவை குறித்து, 1 கொரிந்தியர் 2:9, “தேவன் தன்னை நேசிக்கும் மக்களுக்காகச் செய்த ஏற்பாட்டை எந்த கண்ணும் பார்க்கவில்லை. எந்தக் காதும் கேட்கவில்லை, எந்த மனிதனும் எண்ணிப் பார்த்ததில்லை” என்று கூறுகிறது. எனவே, எவரும் அவ்வாறு கூறுவதைத் தடுப்பதற்காக, திருச்சபையின் அருட்சாதனங்கள் செப ஆலயத்தின் அருட்சாதனங்களை விடப் பழமையானவை என்றும், மன்னாவை விடச் சிறந்தவை என்றும் நிரூபிக்க நாம் மிகவும் கடினமாக உழைக்க வேண்டியிருக்கிறது.
45. இப்போது வாசிக்கப்பட்ட ஆதியாகமப் புத்தகம், செபக்கூடம் மிகவும் தொன்மையானது என்பதைக் காட்டுகிறது, ஏனெனில் அது மோயீசனின் சட்டத்திலிருந்து தோன்றியது. ஆனால் ஆபிரகாம் அதைவிட மிகவும் முந்தையவர்; அவர் பகைவனை வென்று, தன் சொந்த மருமகனை மீட்டுக்கொண்ட பிறகு, தன் வெற்றியைக் கொண்டாடிக்கொண்டிருந்த போது, மெல்கிசேதேக் அவரைச் சந்தித்தார். அந்த நேரத்தில் அவரைச் சந்தித்த மெல்கிசேதேக் சில பொருட்களைத் தன்னுடன் கொண்டு வந்திருந்தார். அவற்றை ஆபிரகாம் மரியாதையுடன் ஏற்றுக்கொண்டார். ஆபிரகாம் அல்ல, மெல்கிசேதேக்கே அந்தப் பொருட்களை வெளியே எடுத்திருந்தார். தேவகுமாரனைப் போலவே, மெல்கிசேதேக்குக்கும் பெற்றோர் இருக்கவில்லை. அவருடைய வாழ்க்கைக்குத் தொடக்கமும் முடிவும் இல்லை என்று இந்த வசனம் அறிமுகப்படுத்துகிறது. பவுல் இதைப் பற்றி எபிரேயர்களிடம் பேசுகையில், தேவகுமாரன் என்றென்றும் ஆசாரியராக இருக்கிறார் என்று கூறுகிறார். இலத்தீன் மொழி பெயர்ப்பில், அவர் நீதியின் அரசர் என்றும் சமாதானத்தின் அரசர் என்றும் அழைக்கப்படுகிறார்.
46. அவர் யார் என்று உங்களுக்குத் தெரியுமா? ஒருவன் தான் நீதியுள்ளவனாக இருக்க எண்ணிப் போராடலாம், ஆனால் அவனால் உண்மையிலேயே நீதியின் அரசனாக ஆக முடியுமா? ஒருவன் சமாதானமாக இல்லாதபோது, அவனால் சமாதானத்தின் அரசனாக எப்படி இருக்க முடியும்? கர்த்தர் தம்முடைய தெய்வீகத்தின்படி தாயில்லாதவர், ஏனெனில் அவர் பிதாவாகிய தேவனால், பிதாவின் அதே சாராம்சத்தைப் பகிர்ந்துகொண்டு படைக்கப்பட்டார்; அவர் ஒரு கன்னியிடமிருந்து பிறந்ததால், அவதாரத்தின் அடிப்படையில் அவருக்குத் தந்தை இல்லை; அவருக்கு ஆரம்பமும் முடிவும் இல்லை, ஏனெனில் அவரே எல்லாவற்றிற்கும் தொடக்கமும் முடிவும், முதலும் முடிவும் ஆவார். எனவே, நீங்கள் பெற்ற அருட்சாதனம் மனிதனால் அருளப்பட்டது அல்ல, அது கடவுளிடமிருந்து கிடைத்த ஒரு கொடையாகும்; விசுவாசத்தின் தந்தையான ஆபிரகாமை ஆசீர்வதித்தவரால் அது வழங்கப்பட்டது, அதன் காரணமாக அவருடைய அருளையும் செயல்களையும் நாம் போற்றுகிறோம்.
47. திருச்சபையின் அருட்சாதனங்கள் மிகவும் தொன்மையானவை என்பதை நாம் நிரூபித்துள்ளோம்; இப்போது அவை மேலானவை என்பதையும் ஏற்றுக்கொள்கிறோம். கடவுள் மக்களுக்கு விண்ணிலிருந்து மன்னாவை உணவாக அளித்தது ஆச்சரியமானது; அதனால் தான் அவர்கள் தேவதூதர்களின் உணவை உண்டார்கள் என்று சொல்லப்படும் அளவிற்கு அது அற்புதமாக இருந்தது. இருப்பினும், அந்த உணவை உண்ட அனைவரும் இறுதியில் வனாந்தரத்தில் மரித்தார்கள். ஆனால் நீங்கள் பெறும் உணவு விண்ணிலிருந்து இறங்கி வந்த வாழ்வுதரும் அப்பமாகும். இந்த அப்பம் உங்களுக்கு நித்திய ஜீவனை அளிக்கிறது; இது கிறிஸ்துவின் திருவுடல் என்பதால், இதை உண்பவர் ஒருபோதும் இறவார்.
48. இப்பொழுது, தேவதூதர்களின் அப்பம் மேன்மையானதா அல்லது மெய்யாகவே வாழ்வு தரும் அப்பமாகிய கிறிஸ்துவின் சரீரம் மேன்மையானதா என்பதைச் சற்று சிந்தித்துப் பாருங்கள். மன்னா வானத்திலிருந்து வந்தது, ஆனால் இது வானத்தைவிட மேலான இடத்திலிருந்து வந்தது; அது வானங்களின் படைப்பாளரான ஆண்டவரிடமிருந்து வந்தது. மன்னா ஒரே இரவு வைக்கப்பட்டால் கெட்டுப்போகக்கூடும், ஆனால் பிந்தையது என்றும் கெடாதது. மரியாதையுடன் அதை உண்பவர் ஒருபோதும் அழிவைச் சந்திக்கமாட்டார். அவர்களுக்காகப் பாறையிலிருந்து தண்ணீர் ஊற்றடுத்தது ஆனால் உங்களுக்காகக் கிறிஸ்துவிடமிருந்து அவரது திவ்விய இரத்தம் கொடுக்கப்பட்டது. தண்ணீர் அவர்களைத் தற்காலிகமாகத் திருப்திப்படுத்தியது, ஆனால் கிறிஸ்துவின் திரு இரத்தம் உங்களை நித்தியமாகத் திருப்திப்படுத்துகிறது. யூத மக்கள் குடித்து மீண்டும் தாகம் கொண்டனர்; ஆனால் நீங்கள் பருகிய பிறகு மீண்டும் ஒருபோதும் தாகம் கொள்ளமாட்டீர்கள். மன்னா ஒரு அடையாளமாக இருந்தது, ஆனால் பிந்தையது என்றும் உண்மையாக இருந்தது.
49. நீங்கள் மிகவும் ஆச்சரியப்படும் காரியம் ஒரு நிழலாக இருந்தால், நீங்கள் ஆச்சரியப்படும் அந்த நிழலின் ஆதாரம் எவ்வளவு பெரியதாக இருக்க வேண்டும் என்று எண்ணிப்பாருங்கள்! நம் முன்னோர்களின் விஷயத்தில், அவர்கள் ஒரு நிழலாக இருந்த ஒன்றை அனுபவித்தார்கள்: தங்களைப் எதிர்கொண்ட பாறையிலிருந்து அவர்கள் நீரைப் பருகினார்கள், அந்தப் பாறை கிறிஸ்துவாக இருந்தது. இருப்பினும், அவர்களில் பலர் மீது கடவுளுக்குப் பிரியமில்லை, அவர்கள் வனாந்தரத்தில் வீழ்ச்சியைச் சந்தித்தனர், என்று 1 கொரிந்தியர் 10:4 கூறுகிறது. இந்த நிகழ்வுகள் நமக்கு எடுத்துக்காட்டுகளாக இருந்தன. இப்போது எது உண்மையிலேயே சிறந்தது என்பதை நீங்கள் காண்கிறீர்கள்—ஒளி நிழலை விட மேலானது, சத்தியம் உருவத்தை விடச் சிறந்தது, மேலும் மெய்யான திருவுடல் விண்ணிலிருந்து வரும் மன்னாவை விட பெறுமதி வாய்ந்தது.
அத்தியாயம் 9
வெளித்தோற்றத்தை மட்டும் கண்டு எவரும் தங்கள் விசுவாசத்தில் தளர்ந்துவிடக் கூடாது என்பதற்காக, வெளித்தோற்றம் மாற்றமடைந்த பல உதாரணங்கள் முன்வைக்கப்படுகின்றன; அதன் மூலம் அப்பம் கிறிஸ்துவின் உண்மையான உடலாக மாற்றப்படுகிறது என்பது நிரூபிக்கப்படுகிறது. பின்னர், இந்தத் திருச்சடங்கின் விளைவுகள், அதைப் பெறுபவர்களின் மனநிலை மற்றும் அது போன்ற பிறவற்றைப் பற்றிய சில குறிப்புகளுடன் இந்த ஆய்வுரை நிறைவு பெறுகிறது.
50. ஒருவேளை நீங்கள் கேட்கலாம், ‘நான் வேறொன்றைக் காண்கிறேன்; நான் கிறிஸ்துவின் திருவுடலைப் பெறுகிறேன் என்று நீங்கள் எப்படி உறுதியாகக் கூறுகிறீர்கள்?’ என்று. இதுவே நாம் இன்னும் நிரூபிக்க வேண்டிய விடயமாகும். நாம் என்ன சான்றுகளைப் பயன்படுத்த வேண்டும்? இது இயற்கையால் உருவாக்கப்பட்டதல்ல, மாறாக ஆசீர்வாதத்தால் புனிதப்படுத்தப்பட்டது என்றும், ஆசீர்வாதத்தின் வல்லமை இயற்கையின் வல்லமையை விட மேலானது என்றும் நாம் காட்டுவோம், ஏனெனில் ஆசீர்வாதமே இயற்கையை மாற்றுகிறது.
51. மோயீசன் ஒரு கோலை வைத்திருந்தார், அதை அவர் கீழே வீசி எறிந்தபோது, அது ஒரு பாம்பாக மாறியது. யாத்திராகமம் 4:3-4 இல் காட்டப்பட்டவாறு, “மோயீசன் தனது கைத்தடியை நிலத்தில் போட்டதும், அது பாம்பாக மாறிற்று. அதைக்கண்ட மோயீசன் பயந்து அங்கிருந்து ஓடினான். கர்த்தர் அவனை நோக்கி, “உன் கையை நீட்டி, பாம்பின் வாலைப் பிடி” என்றார். உடனே மோயீசன் தன் கையை நீட்டிப் பாம்பின் வாலைப் பிடித்தான். அப்போது பாம்பு மீண்டும் கைத்தடியாயிற்று” என்கிறது. அவருடைய தீர்க்கதரிசிப் பாத்திரத்தின் மூலம், பாம்பும் கோலும் உடனுக்குடன் மாறின என்பதை இது காட்டுகிறது. எகிப்தின் ஆறுகளில் சுத்தமான தண்ணீர் ஓடிக்கொண்டிருந்தது, ஆனால் திடீரென்று, அவற்றின் மூலங்களிலிருந்து இரத்தம் பாயத் தொடங்கியது, இதனால் ஆற்றில் இருந்த நீரைக் குடிப்பது சாத்தியமற்றதாகியது. அப்போது தீர்க்கதரிசி ஜெபித்தார். அவரது செபம் இரத்தம் ஓடுவது நிற்பதற்கும், தண்ணீர் மீண்டும் வருவதற்கும் வழிவகுத்தது. எபிரேய மக்கள் ஒருபுறம் எகிப்தியர்களாலும் மறுபுறம் கடலாலும் சூழப்பட்டு சிக்கிக்கொண்டனர்; அப்போது மோயீசன் தன் கோலை உயர்த்தினார். உடனே கடல்நீர் இரண்டாகப் பிரிந்து, சுவர்களை உருவாக்கி, அவர்கள் நடந்து செல்ல ஒரு பாதையை ஏற்படுத்தியது. யோர்தான் அருகிலுள்ள ஊராகிய ஆதாம் வரைக்கும் நதியின் தண்ணீர் அணைபோல் நின்றது, என்று யோசுவா 3:16 கூறுகிறது. இது இயற்கைக்கு முரணானது. கடல் அலைகளின் தன்மையும் நதியின் தன்மையும் மாறியது என்பது வெளிப்படையாகத் தெரியவில்லையா? ‘மக்களின் முன்னோர்கள் தாகமாக இருந்தார்கள், அப்போது மோயீசன் ஒரு பாறையைத் தன் கோலால் தொட்டபோது, தண்ணீர் ஊற்றெடுத்தது’ என்று யாத்திராகமம் 17:6 கூறுகிறது. அப்படியானால் கிருபை இயற்கைக்கு முரணாக ஒன்றை உண்டாக்கவில்லையா? பாறையில் இயல்பாகக் கிடைக்காத தண்ணீரை கிருபை அல்லவா கொடுக்கச் செய்தது? ‘மாரா மிகவும் கசப்பான நீரோடையாக இருந்தது, தாகமுள்ள மக்களால் அதிலிருந்து நீரைக் குடிக்க முடியவில்லை. அப்போது மோயீசன் தண்ணீரில் விறகுகளைப் போட்டார், உடனடியாக, தண்ணீர் சுத்தமான குடிநீராக மாறியது’ என்று யாத்திராகமம் 15:25 இல் கூறப்பட்டுள்ளது. தீர்க்கதரிசியாகிய எலிசாவின் காலத்தில், தீர்க்கதரிசிகளில் ஒருவர் தன் கோடரியின் முனைப் பகுதியைத் தண்ணீரில் தவற விட்டுவிட்டான். அது மூழ்கிப்போனது. இரும்பினால் ஆன அந்தக் கோடரியை இழந்த அந்த மனிதன் எலிசாவிடம் உதவும்படி கேட்டான். உடனே எலிசா ஒரு விறகுத் துண்டைத் தண்ணீரில் வீசியெறிந்தவுடன் அந்தக் கோடரி மேலே மிதந்து வந்தது. இரும்பு தண்ணீரை விட கனமானது என்றபோதும், இதுவும் இயற்கைக்கு முரணாக நடந்த ஒரு தெளிவான உதாரணமாகும்.
52. ஆகையால், கிருபையானது இயற்கையை விட அதிக வல்லமை கொண்டது என்பதை நாம் காண்கிறோம். எனினும், இதுவரை நாம் ஒரு தீர்க்கதரிசியின் ஆசீர்வாதத்தில் காணப்படும் கிருபையைப் பற்றி மட்டுமே பேசியுள்ளோம். ஒரு மனித ஆசீர்வாதத்திற்கு இயற்கையை மாற்றும் சக்தி இருக்குமானால், ஆண்டவரும் இரட்சகருமானவரின் உண்மையான வார்த்தைகள் தாக்கத்தை ஏற்படுத்தும் அந்த தெய்வீக அர்ப்பணிப்பைப் பற்றி நாம் என்ன சொல்வது? ஏனென்றால், நீங்கள் பெறும் திருவருட்சாதனம் கிறிஸ்துவின் வார்த்தையின் மூலமாகத்தான் திருவருட்சாதனமாக மாறுகிறது. எலியா பேசிய வார்த்தைக்கு வானத்திலிருந்து அக்கினியை வரவழைக்கும் சக்தி இருக்குமானால், கிறிஸ்துவின் வார்த்தைக்கு பஞ்சபூதங்களின் அடிப்படை அமைப்பை மாற்றும் சக்தி இருக்க வேண்டுமல்லவா? முழு உலகமும் எவ்வாறு உருவாக்கப்பட்டது என்பதைப் பற்றி நீங்கள் அறிந்துள்ளீர்கள்: தேவன் பேசியவுடன் பொருட்கள் உண்டாயின; அவர் கட்டளையிட்டார், அவைகள் படைக்கப்பட்டன. வெறுமையிலிருந்து ஒன்றை உருவாக்க வல்லவரான கிறிஸ்துவின் வார்த்தையால், ஏற்கனவே இருக்கும் பொருட்களை வேறு ஒன்றாக மாற்ற முடிவது எவ்வளவு இலகுவானது? ஏனென்றால், பொருட்களுக்கு ஒரு புதிய இயல்பைக் கொடுப்பது, அவற்றை மாற்றுவதை விடக் கடினமானதல்ல.
53. வாதங்களைப் பயன்படுத்துவதற்குப் பதிலாக, அவர் வழங்கும் உதாரணங்களைப் பயன்படுத்துவோம். அவதாரத்தின் உதாரணத்தை நோக்குவதன் மூலம் அந்த இரகசியத்தின் உண்மையை நாம் நிரூபிக்க முடியும். ஆண்டவராகிய இயேசு கன்னி மரியாளிடமிருந்து பிறந்தபோது, இயற்கை வழக்கம் போல் செயல்பட்டதா? நாம் வழக்கமான நிகழ்வுகளைப் பார்த்தால், பொதுவாக ஒரு பெண் ஒரு ஆணுடன் உடலுறவு கொண்ட பிறகு தான் கருத்தரிக்கிறாள். நாம் பயன்படுத்தும் உடல் கன்னியிடமிருந்து பிறந்ததாகும். இயற்கைக்கு மாறான விதத்தில், ஆண்டவராகிய இயேசுவே ஒரு கன்னியிடமிருந்து பிறந்திருக்க, நீங்கள் ஏன் கிறிஸ்துவின் திருவுடலில் இயற்கையின் இயல்பான ஒழுங்கைத் தேடுகிறீர்கள்? கிறிஸ்துவின் மெய்யான திருவுடல் சிலுவையில் அறையப்பட்டு அடக்கம் செய்யப்பட்டது; இதுதான் மெய்யாகவே அவருடைய திருவுடலின் அருட்சாதனமாகும்.
54. மத்தேயு 26:26-ல் காட்டப்பட்டுள்ளவாறு, கர்த்தராகிய இயேசு தாமே, “இது என் சரீரம்,” என்று கூறுகிறார். பரலோக வார்த்தைகளின் ஆசீர்வாதத்திற்கு முன்பு, அது வேறு விதமாகவும், ஆசீர்வாதத்திற்குப் பிறகு அது அவருடைய சரீரம் என்றும் அழைக்கப்படுகிறது. அவர் தமது இரத்தத்தைப் பற்றியும் பேசுகிறார், அது ஆசீர்வாதத்திற்கு முன்பு வேறொரு பெயரைக் கொண்டிருந்தபோதும், அதன் பிறகு திரு இரத்தம் என்று அழைக்கப்படுகிறது. நீங்கள் “ஆமென்” என்று சொல்லும்போது, அதன் அர்த்தம் “இது உண்மையே” என்பதாகும். உங்கள் வாய் சொல்வதை உங்கள் இதயம் நம்பட்டும், உங்கள் குரல் வெளிப்படுத்துவதை உங்கள் மனம் உணரட்டும்.
55. கிறிஸ்துவோ, தமது திருச்சபையை இந்த அருட்சாதனங்களால் போஷிக்கிறார்; இந்த அருட்சாதனங்கள் ஆன்மாவின் சாரத்தைப் பலப்படுத்துகின்றன. அதன் அருளின் தொடர்ச்சியான வளர்ச்சியைக் கண்டு அவர் திருச்சபையிடம் சரியாகவே கூறியுள்ளார்: என் சகோதரியே, என் மணவாட்டியே, உன் மார்பகங்கள் அழகானவை; அவை திராட்சைரசத்தால் அழகுபடுத்தப்படுகின்றன. உன் ஆடையின் நறுமணம் எல்லா நறுமணப் பொருட்களையும் விடச் சிறந்தது. என் மணவாட்டியே, உன் உதடுகள் தேன் சொட்டும் தேன்கூட்டைப் போன்றவை; உன் நாவின் கீழ் தேனும் பாலும் உள்ளன, உன் ஆடையின் வாசனை லெபனானின் வாசனையைப் போன்றது. என் சகோதரியே, என் மணவாட்டியே, பாதுகாக்கப்பட்ட நந்தவனம், முத்திரையிடப்பட்ட நீரூற்று. இதன் மூலம், அந்த இரகசியம் உன்னுடன் முத்திரையிடப்பட்டே இருக்க வேண்டும் என்று அவர் குறிப்பிடுகிறார். அது தீய செயல்களாலோ அல்லது தூய்மையை இழப்பதாலோ பாழாகிவிடக்கூடாது. மேலும் அது அறியக்கூடாதவர்களுக்கு வெளிப்படுத்தப்படக்கூடாது, அல்லது அவிசுவாசிகளிடையே வீண் பேச்சுகளால் பரப்பப்படவும் கூடாது. எனவே, உங்கள் விசுவாசத்தின் பாதுகாப்பு வலுவாக இருக்க வேண்டும், அப்போதுதான் உங்கள் வாழ்க்கை முறையும் அமைதியாகவும் தூய்மையாகவும் இருக்க முடியும்.
56. இக்காரணத்தினாலேயே, திருச்சபையும் விண்ணுலக இரகசியங்களின் ஆழத்தைக் காக்கிறது. அது பலத்த காற்று மற்றும் புயல்களைப் புறந்தள்ளி, வசந்த காலத்து அருளின் மென்மையான அழகை வரவேற்கிறது. தன் தோட்டம் கிறிஸ்துவைப் பிரியப்படுத்தும் என்பதை அறிந்த அவள், மணவாளனை இவ்வாறு அழைக்கிறாள்: “வடக்கின் காற்றே, எழுந்திரு; தெற்கின் தென்றல் காற்றே, வா; என் தோட்டத்தின்மேல் வீசு, அதனால் தோட்டத்தின் நறுமணங்கள் பரவட்டும். என் சகோதரன் தன் தோட்டத்திற்குள் இறங்கி வந்து, அங்குள்ள மரங்களின் கனிகளை உண்ணட்டும்.” ஏனென்றால், அந்தத் தோட்டத்தில் நல்ல கனி தரும் மரங்கள் உள்ளன; அவற்றின் வேர்கள் புனித நீரூற்றிலிருந்து நீரை உறிஞ்சுகின்றன. இந்த மரங்கள் புதிய ஜீவனுடன் நல்ல கனிகளாக வளர்ந்துள்ளன, எனவே அவை தீர்க்கதரிசியின் கோடரியால் வெட்டப்படக்கூடாது, மாறாக நற்செய்தி என்ற கனியின் மிகுதியால் நிறைந்திருக்க வேண்டும்.
57. இறுதியாக, கர்த்தர் அவர்களுடைய செழிப்பைக் கண்டு மகிழ்ந்து, “என் சகோதரியே, என் மணவாட்டியே, நான் என் தோட்டத்தினுள் பிரவேசித்தேன்; என் நறுமணப் பொருட்களுடன் என் வெள்ளைப் போளத்தைச் சேகரித்தேன், தேனுடன் என் உணவை உண்டேன், பாலுடன் என் பானத்தை அருந்தினேன்” என்று கூறியதாக உன்னதப்பாட்டு 5:1 கூறுகிறது. விசுவாசிகளே, அவர் ஏன் உணவையும் பானத்தையும் பற்றிப் பேசினார் என்பதைப் புரிந்து கொள்ளுங்கள். மத்தேயு 25:36-ல் நீங்கள் வாசிப்பது போல, அவர் நமக்குள்ளே பிரசன்னமாக இருக்கிறார் என்பதில் சந்தேகமில்லை.
58. எனவே, திருச்சபை தனது உறுப்பினர்களையும் நண்பர்களையும் அருட்சாதனங்களுக்காக ஒன்றுகூடுமாறு ஊக்குவிக்கிறது, உன்னதப்பாட்டு 5:1-ல் காணப்படுவதுபோல, “என் நண்பர்களே, உண்ணுங்கள், பருகுங்கள், என் சகோதரரே, மகிழ்ச்சியால் நிரப்பப்பட்டவர்களாக இருங்கள்” என்று கூறுகிறது. நாம் உண்பதையும் பருகுவதையும் இறைவாக்கினர் மூலம் பரிசுத்த ஆவியானவர் தெளிவுபடுத்தியுள்ளார், “கர்த்தர் நல்லவர் என்பதை சுவைத்துப்பாருங்கள்; அவர்மீது நம்பிக்கை வைப்பவன் பாக்கியவான்.” இந்த அருட்சாதனத்தின் வாயிலாக நாம் கிறிஸ்துவைப் பெற்றுக்கொள்கிறோம், ஏனெனில் அது கிறிஸ்துவின் திருவுடல் ஆகும். இது வெறும் பௌதீக உணவு மட்டுமல்ல, ஆன்மீக உணவும் ஆகும் என்று 1 கொரிந்தியர் 10:3-ல் காட்டப்பட்டுள்ளது. நம் முன்னோர்கள் ஆன்மீக உணவை உண்டு ஆன்மீகப் பானத்தைப் பருகினார்கள் என்று திருத்தூதர் நமக்கு நினைவூட்டுகிறார். ஏனெனில் கடவுளின் திருவுடல் என்பது ஆன்மீகத் திருவுடல் ஆகும். கிறிஸ்துவின் சரீரம் தெய்வீக ஆவியுடன் இணைக்கப்பட்டுள்ளது, அதனால்தான் புலம்பல்கள் 4:20 இல், “நமக்கு முன்பாக இருக்கிற ஆவியானவர் கர்த்தராகிய கிறிஸ்துவே” என்று சொல்கிறது. பேதுருவும் 1 பேதுரு 2:21-இல், “கிறிஸ்து நமக்காக மரித்தார்” என்று பொருள்படும்படி எழுதியுள்ளார். தீர்க்கதரிசியால் பதிவு செய்யப்பட்டபடி, இறுதியில் இந்த உணவு நம் இதயங்களைப் பலப்படுத்துகிறது; இந்தப் பானம் நம் இதயங்களுக்கு மகிழ்ச்சியைத் தருகிறது.
59. ஆகவே, மேற்கூறப்பட்ட எல்லாவற்றையும் புரிந்துகொண்டபின் நாம் மறுபடியும் பிறந்திருக்கிறோம் என்பதை உணர்வோம். ஆனால், நாம் எப்படி மறுபடியும் பிறந்தோம் என்று கேட்க வேண்டாம். மறுபடியும் பிறப்பதற்காக நாம் நம் தாயின் கருப்பைக்குள் மீண்டும் நுழைகிறோம் என்று அர்த்தமல்ல. இது இயற்கையின் நியதிக்கு முரணானது. இந்த விஷயத்தில், இயற்கையின் நியதி என்று எதுவும் இல்லை, கிருபையின் மகத்துவம் மட்டுமே மேலோங்கி நிற்கிறது. மேலும், கருத்தரிப்புக்கு எப்போதும் இயற்கை காரணமாக இருப்பதில்லை. ஆண்டவராகிய கிறிஸ்து ஒரு கன்னியின் கருவில் உதயமானார் என்பது நமக்குத் தெரியும். முறைப்படி பார்த்தால், இது இயற்கையின் நியதிக்கு முரணானது. மத்தேயு கூறுவது போல, மரியாள் ஒரு மனிதன் மூலமாகக் கருத்தரிக்கவில்லை, மாறாக பரிசுத்த ஆவியானவராலேயே கருத்தரித்தார்: “பரிசுத்த ஆவியின் வல்லமையால் மரியாள் கருவுற்றிருந்தாள்” என்று மத்தேயு 1:18 கூறுகிறது. எனவே, கருத்தரிப்பை ஏற்படுத்தும் முகமாக பரிசுத்த ஆவியானவர் கன்னிமரியாளின் மீது இறங்கி வந்திருந்த காரணத்தால், அவர் ஞானஸ்நானத்தின் போது காணப்படும் தண்ணீர் மீதோ அல்லது ஞானஸ்நானம் பெறுபவர்கள் மீதோ இறங்கி வரும்போது, அவர் மறுபிறப்பை அருளுகிறார் என்று நாம் நிச்சயமாக நம்பலாம்.